એક નિવેદનથી ફરી કોંગ્રેસમાં ઘરવાપસીના સંકેત

કોંગ્રેસ પાર્ટીના પૂર્વ દિગ્ગજ નેતા અને હાલમાં ભાજપ રાષ્ટ્રીય કાર્યકારિણીના સભ્ય અમરિંદર સિંહે શુક્રવારે એક મોટું નિવેદન આપ્યું હતું. તેમણે ભારપૂર્વક જણાવ્યું હતું કે, તેમને ભાજપનો અભિગમ કઠોર લાગે છે, જ્યારે કોંગ્રેસ પાર્ટી વધુ લવચીક અને સલાહકારી છે.

આ પણ વાંચોઃ ઉત્તર ભારતમાં કાતિલ ઠંડીનો દોર : હિમાચલ અને ઉત્તરાખંડના તળાવો થીજી ગયા, ટુરિસ્ટ ગેલમાં

કોણ છે કેપ્ટન અમરિંદર સિંહ?

કેપ્ટન અમરિંદર સિંહે કોંગ્રેસના શાસન દરમિયાન બે વાર પંજાબના મુખ્યમંત્રી તરીકે સેવા આપી હતી. તેઓ 2022માં તેમની પાર્ટી, પંજાબ લોક કોંગ્રેસ (PLC)નું વિલીનીકરણ કર્યા પછી ભાજપમાં જોડાયા હતા. તેમણે 2021માં ભારતીય રાષ્ટ્રીય કોંગ્રેસ છોડી દીધી હતી, કારણ કે તેમણે પાર્ટીના નેતા સોનિયા ગાંધી અને તેમના બાળકો, રાહુલ ગાંધી અને પ્રિયંકા વાડ્રા ગાંધીના વર્તન પ્રત્યે નારાજગી દર્શાવી હતી.

ભાજપ પર પ્રહાર

પંજાબમાં 2027ની શરૂઆતમાં યોજાનાર વિધાનસભાની ચૂંટણી પહેલાં અમરિંદર સિંહની તાજેતરની ટિપ્પણીઓને રાજકીય રીતે મહત્ત્વપૂર્ણ માનવામાં આવે છે. કારણ કે, ભાજપ રાજ્યમાં એક મહત્ત્વપૂર્ણ રાજકીય શક્તિ તરીકે પોતાને સ્થાપિત કરવાનું ચાલુ રાખે છે. મીડિયા સાથે વાત કરતા, અમરિંદર સિંહે કહ્યું, “પંજાબ એક અલગ પ્રદેશ છે. તમે જુઓ, ભાજપ દરેક જગ્યાએ પ્રગતિ કરી રહી છે, પરંતુ પંજાબમાં કેમ નહીં? છેલ્લી ચૂંટણીઓ જુઓ, તેણે કેટલી બેઠકો જીતી, ભાગ્યે જ કોઈ. આનું કારણ એ છે કે ભાજપ એવા લોકો પાસેથી સલાહ લેતું નથી જેઓ ક્ષેત્રમાં રહ્યા છે, જેઓ શું કહેવું તે જાણે છે. નિર્ણયો ટોચના સ્તરે લેવામાં આવે છે; કોંગ્રેસમાં પણ, નિર્ણયો ટોચના સ્તરે લેવામાં આવતા હતા, પરંતુ તેઓ અમારી પાસેથી, બધા પાસેથી, ધારાસભ્યો, સાંસદો પાસેથી સલાહ લેતા હતા. અહીં ભાજપમાં, મને નથી લાગતું કે કોઈએ પૂછ્યું હોય.”

આ પણ વાંચોઃ ગૃહ મંત્રાલયનો આદેશ : પોલીસ-એજન્સીઓ અનમોલ બિશ્નોઈને એક વર્ષ સુધી કસ્ટડીમાં નહીં લઈ શકે, કલમ-303 લાગુ

રાજકારણમાં ગરમાવો

કેપ્ટન અમરિંદર સિંહના તાજેતરના નિવેદનથી પંજાબના રાજકીય વર્તુળોમાં કોંગ્રેસ પાર્ટીમાં પાછા ફરવાની ચર્ચાઓ શરૂ થઈ ગઈ છે. જોકે, તેમણે આ વાતનો સ્પષ્ટ ઇનકાર કર્યો છે. જ્યારે તેમને પૂછવામાં આવ્યું કે, શું તેઓ કોંગ્રેસ પાર્ટીને યાદ કરે છે, ત્યારે અમરિંદર સિંહે જવાબ આપ્યો, “ના, કોંગ્રેસ સિસ્ટમ અલગ હતી. મને તે સિસ્ટમની યાદ આવે છે. ત્યાં વ્યાપક પરામર્શ અને અનુભવનું મૂલ્ય હતું, જેનો ભાજપ પાસે અભાવ છે. કોંગ્રેસ મંતવ્યો સ્વીકારવામાં વધુ લવચીક છે; મને લાગે છે કે ભાજપનો અભિગમ થોડો કઠોર છે.”